Засгийн газрын 2024-2028 оны үйл ажиллагааны хөтөлбөрийг хэлэлцэж байна. Үндэсний аудитын газраас "Засгийн газрын мөрийн хөтөлбөрийн биелэлт 60 хувьтай, хангалттай" гэж үнэлсэн байна. Харин УИХ-ын гишүүн Г.Лувсанжамц үүнтэй санал нийлэхгүй байгаагаа илэрхийллээ. 

Тэрээр "Монгол Улсын Засгийн Газар, Их Хурлын Тамгын Газар, Үндэсний аудитын газрууд үр дүнд суурилсан хяналт, үнэлгээг хийж чадахгүй байна. Бодлогын хэрэгжилтээ ярих ёстой болохоос биш хийж байгаа ажлаа ярьж болохгүй. Бодлогын хэрэгжилт гэдэг бол үр дүн буюу иргэдийн орлого дээшилж байна уу, утаа түгжрэл буурч байна уу гэдгийг ярихыг хэлнэ. Түүнээс биш ийм байшин барих төлөвлөгөө гаргасан байшингаа бариад дууссан 100 хувийн биелэлттэй байна гэдэг зүйлийг ярьж болохгүй гэдгийг хэлсэн. 

Төрийн өмчийн компаниудын засаглалыг сайжруулна гэж байгаа. Гэтэл 2023 онд 5,4 тэрбум, 2024 онд 76 тэрбумын алдагдалтай, муудчихаад орж ирж байхад зорилтын биелэлт 100 хувь гээд оруулаад ирж байна. Төлөвлөгөөгөө зөв үнэлж чадахгүй юм бол төлөвлөгөө гаргаад хэрэггүй. Бид чанарын үзүүлэлтийг ярих ёстой" гэв. 

Шууд дамжуулалтыг үзэх: