Украинд Ерөнхийлөгчийн сонгууль явуулахаар бэлтгэж байгаа зүйл байхгүй хэмээн эрх баригч “Слуга народа” намын парламент дахь бүлгийн дарга Давид Арахамия мэдэгдлээ. Одоогийн Ерөнхийлөгч Володимир Зеленский хоёр дахь удаагаа сонгуульд өрсөлдөхөөр бэлтгэж, гал зогсоосны дараа сонгуулийг зохион байгуулах даалгавар өгсөн хэмээн The Economist мэдээлсэн. Дайны байдлыг цуцалснаас 60 хоногийн дараа сонгууль явуулж болно, 2025 оны долдугаар сард сонгууль болж магадгүй хэмээн бичсэн аж. “Би тиймэрхүү зөвлөгөөнд оролцоогүй, тийм зөвлөгөөн ч огт болоогүй. Ямар ч сонгуульд бэлтгээгүй. Дайны байдлыг цуцалснаас хойш зургаан сарын дараа сонгууль болох ёстой гэдэг дээр парламентын бүх нам, бүлэг тохиролцсон байгаа” хэмээн Арахамия ярьжээ. Зеленскийн нэр хүнд өсөхийн хэрээр сонгуулийн тухай яриа гарах болсон юм. Зеленский, Трамп нар гуравдугаар сарын эхээр Цагаан ордонд уулзаж ширүүхэн маргалдсаны дараа Ipsos фирмээс явуулсан судалгаагаар украинуудын 70 хувь нь Ерөнхийлөгчөө дэмжих болсон аж. Украинуудын 75 хувь нь түүнийг Оростой хэлэлцээ хийхэд таарч тохирох хүн хэмээн нэрлэжээ. Украины Ерөнхийлөгчийн сонгууль 2024 он болох байсан ч Оросын арми Украинд орж дайны байдал үүссэн тул хойшлогдоод байгаа юм.