Метилийн спирт нь ямар нэгэн өнгөгүй,  техникт хэргэлдэг, маш бага хэмжээгээр хэргэлэхэд л сохрох, үхэлд хүргэх аюултай шингэн юм. Өнгөгүй, спирттэй төстэй учраас андуурч уух тохиолдол гардаг байна.

2008 онд болсон нэгэн хэргийн эргэн сануулбал, Багануур дүүрэгт “Азийн чоно” компани метилийн спиртээр архи найруулснаас үүдэн 14 иргэн амиа алдаж, олон тооны иргэн хордлогын яаралтай тусламжийн төвд хэвтэн эмчлүүлсэн байдаг. Мөн тухайн онд Ховд аймгийн Ярантын боомтоор энэ сарын 3-нд Хятад улсад үйлдвэрлэсэн спирт оруулж ирэхийг завдсан хэргүүд ч гарч байсан юм.

Манай улсад метилийн спиртийг ямар нэгэн хараа хяналтгүйгээр энгийн бүтээгдэхүүн шиг худалдаалдаг нь аюул дагуулж байна.

Харин өнгөрсөн сарын 28-ны өдөр Багануур дүүрэгт метилийн спиртэд хордсон байж болзошгүй 2 иргэн эмнэлэгт хүргэгдсэн хэрэг гарсан. Хэргийг тодруулбал, Дүүргийн эрүүл мэндийн төвд хүргэгдсэний дараа 1 иргэн нь амиа алдаж, 1 иргэн сэхээн амьдруулах тасагт хэвтэн эмчлүүлж байгаа юм.

Тус асуудлын талаар НЦУГ-ын ахлах мэргэжилтэн, цагдаагийн хошууч С.Баярбилэгээс тодруулахад, "Багануур дүүргийн ЭМТ-өөс 2025 оны гуравдугаар сарын 28-ны өдрийн 13:00 цагийн үед хордлогод орсон байж болзошгүй хоёр иргэн ирж эмчилгээ хийлгээд нэг иргэн нас барсан тухай мэдээллийг өгсөн. Мэдээллийн хүрээнд мөрдөн шалгах ажиллагааг үргэлжлүүлж байна.

Урьдчилсан байдлаар Багануур ХК-д ажилладаг болохыг тогтоосон. Тухайн компани болон эрүүл мэндийн байгууллагын зүгээс метилийн спирт байх магадлалтай гэдэг мэдээллийг өгсөн. Гэхдээ цагдаагийн байгууллагаас шалгалтын ажил дууссаны дараа шалтгаан нөхцөлийг тогтооно гэсэн юм.

Тиймээс манай сайтын сурвалжлах баг тус хэрэгтэй холбогдуулан Багануур дүүрэгт ажиллан сурвалжиллаа.

Хордлогод орсон 2 иргэн Багануур хувьцаат компанийн ажилчид байсан

Багануур хувьцаат компанийн захирал Д.Түвшинжаргал тус хэрэгтэй холбогдуулан зарим зүйлсийг тодрууллаа. 

-Гуравдугаар сарын 28-ны өдөр танай компанийн 2 ажилтан хордлогод орсны улмаас эмнэлэгт хүргэгдэн 1 нь харамсалтайгаар амиа алдаж, 1 иргэний биеийн байдал хүн байгаа гэх мэдээлэл байна. Тухайн өдөр яг юу болсон талаар та бидэнд мэдээлэл өгвөл

-Өнгөрсөн 7 хоногийн баасан гараг буюу 3-р сарын 28-ны өглөөний 10 цаг 28 минут орчимд манай үйлдвэрийн эмчид Багануур дүүргийн эрүүл мэндийн төвөөс танай компанийн ажилтан байж магадгүй 2 иргэн яаралтай түргэн тусламжаар ирсэн, эрүүл мэндийн хувьд хүнд байна. Тиймээс ирж уулзана уу гэж ярьсан. Ярьж дуусаад 10 цаг 36 минутад манай компанийн хүний нөөцийн дэд захирал, хөдөлмөрийн аюулгүй байдал эрүүл ахуйн хэлтсийн дарга, үйлдвэрийн эмч нар очиж ажилласан.

Очиход харамсалтай нь  манай 1 ажилтан амиа алдсан байсан. 1 ажилтны эрүүл мэндийн байдал хүнд байсан.

Талийгаач манай компанид 10-р ангиа төгсөөд л 30 гаруй жил ажилласан. Тогтвор суурьшилтай  нэр хүндтэй ажилтан байсан. Ажлын сахилга баттай, хариуцлагатай, машин бригадын дарга нь байсан. Харин биеийн байдал нь хүнд байгаа ажилтан компанидаа 10 гаруй жил тогтвор суурьшилтай ажиллаж байгаа, нэр хүнд сайтай, ямар нэгэн сахилгын зөрчилгүй, хариуцлагатай хүн байдаг.

Гэр бүлтэй нь холбогдож хамтын гэрээний дагуу дэмжлэг тусалцаа үзүүлсэн.

-Хэрэг болсон тухайн газарт нь очсон уу, Архины шил ч юм уу метилийн спирт найруулж уусан гэх зүйл танд ажиглагдсан уу

-Манай 2 ажилтан ажлаасаа буугаад гэртээ амарч байх хугацаанд тус хэрэг гарсан. Мэргэжлийн байгууллагууд тогтоохоор ажиллаж байгаа.

Би 2 ажилтнаа метилийн спирт найруулж уусан гэж бодохгүй байгаа.

-Танай компани өвлийн улиралдаа техник тоног төхөөрөмжөө арчлах, цэвэрлэх зорилгоор хэргэлдэг гэсэн. Өмнө нь ижил төстэй асуудал гарч байсан уу

-Өвлийн хүйтэнд тоног төхөөрөмжүүдэд цэвэрлэгээ хийх, техникийн найдвартай бэлэн байдлыг хангах үүднээс хэргэлдэг. Манай техникүүд их хуучирсан, ашиглалтын хугацаа нь 10-20 жил хэтэрчихсэн техникүүд дээр ажилладаг.

Метилийн спиртийг зөвхөн уурхай хэрэлдэггүй. Метилийн спиртийг маш олон салбарт, олон газарт хэргэлдэг. Монголын зах дээлд чөлөөтэй худалдаалагдаж байдаг.Гэхдээ яг одоогийн байдлаар яг юу хэргэлсэн нь тогтоогдоогүй байгаа.

-Хордлогод орж нас барсан, хэвтэн эмчлүүлж байгаа хүний тоо зөрүүтэй байгаад байна. Цагдаагийн байгууллагаас 1 хүн нас барсан гэж байгаа бол эрүүл мэндийн яамнаас 2 иргэн нас барсан гэж мэдээлсэн. Мөн тус эрүүл мэндийн төвд хэвтэн эмчлүүлж байгаа иргэн мэдээлэл өгөхдөө 2 иргэн нас барсан 1 иргэний биеийн байдал маш хүнд байгаа гэсэн. Та яг албан ёсны тоон мэдээллийг нь өгвөл

-Би цагдаагийн байгууллагатай адилхан мэдээлэлтэй байгаа. Манай 1 ажилтан харамсалтай байдлаар бурхан болж, 1 ажилтны биеийн байдал хүнд байгаа. Өнөөдөр биеийн байдал нь хүнд байгаа иргэн эмнэлгийн тусламж үйлчилгээ авснаар биеийн байдал нь сайжирч, ухаан орж, хараа орсон.

6 иргэн хордлогонд орж 2 нь эмнэлэгт хүргэгдсэн гэх мэдээлэл худал

Тус хэргийн талаар Багануур дүүргийн цагдаагийн байгууллагаас тодруулахад,Багануур дүүргийн цагдаагийн газраас ямар нэгэн мэдээлэл өгөх боломжгүй гэх хариуг өгсөн бол тус дүүргийн прокурорын газраас дээрх хэрэг гараад удаагүй учир хэргийн материалтай бүрэн танилцаж амжаагүй байгаа гэх шалтгаанаар мэдээлэл өгөхөөс  татгалзсан хариуг өгсөн. Харин Багануур дүүргийн эрүүл мэндийн төвийн эмнэлгийн тусламж үйлчилгээ хариуцсан орлогч даргаас мэдээлэл авах гэсэн боловч утсаа аваагүй, ажлын цагаар өрөөний хаалга нь түгжээтэй байснаар эрүүл мэндийн байгууллагаас нь мөн л мэдээлэл авч чадаагүй юм.

Харин тус 2 иргэн чухам юунд хордсон нь өнөөдөр ч тодорхойгүй байна. Цагдаагийн байгууллагын дүгнэлт гарснаар тухайн иргэд чухам юунд хордсон нь тодорхой болох юм. 

Эрүүл мэндийн байгууллагын тоон судалгаанаас харахад спиртэд хордож нас барсан тохиолдол сүүлийн жилүүдэд нэмэгджээ.

Тухайлбал, 2020 онд 650 тохиолдол байсан бол 2022 онд 1071 болж нэмэгдсэн аж.

Тиймээс иргэдийг хямд үнэтэй, хаана хэзээ үйлдвэрлэгдсэн нь тодорхойгүй архи согтууруулах ундаа хэрэглэхгүй байхыг зөвлөж байна. Манай сурвалжлах баг холбогдох байгууллагуудын дүгнэлт эцэслэгдсэн гарсны дараа тус хэргийн талаар эргэн мэдээллэх болно. 

Шууд дамжуулалт: