Засгийн газрын хэрэгжүүлэгч агентлаг-Мал эмнэлгийн ерөнхий газар нь Дэлхийн мал амьтны эрүүл мэндийн байгууллага, Дэлхийн хүнс хөдөө аж ахуйн байгууллагатай хамтран Бог малын мялзан өвчнийг устгах үйл ажиллагааны чиглэлээр бүсийн уулзалт, хурлыг 2025 оны 4 дүгээр сарын 1-3-ны өдрүүдэд Улаанбаатар хотноо зохион байгуулж байна.

Тус хуралд Дэлхийн мал, амьтны эрүүл мэндийн байгууллагын БН Франц улсын Парис хотноо байрлах төвийн төлөөлөгчид, НҮБ-ийн ХХААБ-ийн төлөөлөгчид, Бог малын мялзангийн олон улсын лавлагаа лаборатори Франц цлсын CIRAD-ын төлөөлөл, Монгол улс, БНХАУ, Казакстан, Узбезстан, Гүрж, Киргизстан, Тажикстан, Туркменстан, ОХУ болон Дэлхийн мал, амьтны эрүүл мэндийн байгууллагын Зүүн өмнөд азийн бүсийн газрын төлөөлөгчид оролцож байна Бог малын мялзан өвчнийг Дэлхийн Хэмжээнд Хянах, Устгах Стратеги нь 2015 онд батлагдсан бөгөөд 2030 он гэхэд Бог малын мялзан өвчнийг бүрэн устгах, мал эмнэлгийн үйлчилгээг сайжруулах, бог малд нөлөөлөх бусад халдварт өвчний нөлөөг бууруулах зорилтыг тавьсан.

Монгол Улсын Засгийн газар Бог малын мялзан өвчнийг 2030 он гэхэд устгах зорилт бүхий энэхүү Дэлхийн хөтөлбөрийг бүрэн дэмжин ажиллаж байна. Сүүлийн жилүүдэд Монгол Улс болон хөрш орнуудад бүртгэгдсэн дэгдэлтүүд нь энэ өвчнийг устгахын тулд уялдаа холбоотой арга хэмжээ авах, мал эмнэлгийн үйлчилгээг бэхжүүлэх, хил дамнасан хамтын ажиллагааг сайжруулах шаардлагатайг харуулж байна. Дэлхийн хэмжээнд Бог малын мялзан өвчнийг устгах хөтөлбөрийн хоёрдугаар үе шатанд нэвтрүүлсэн тархвар зүйн системийн (эписистемийн) чиг хандлага нь Бог малын мялзан өвчнийг тархалтад нөлөөлж буй олон хүчин зүйлийг нэгтгэн авч үзэх замаар өвчнийг хянах, устгах стратегийг сайжруулах үр дүнтэй арга зам болох юм.

Монгол улсад зохион байгуулсанаар манай улс бог малын мялзан өвчинтэй тэмцэх, устгах арга хэмжээг Дэлхийн мал, амьтны эрүүл мэндийн байгууллагын стандарт, заавар, зөвлөмжийн дагуу зохион байгуулж байгаагаа хөрш зэргэлдээ орнуудад дэлгэрэнгүй танилцуулж, экспортыг нэмэгдүүлэх боломжийг бүрдүүлэх юм.