Францын Ассамблей дахь Үндэсний цуглаан (National Rally, хуучин Үндэсний фронт нам) намын лидер, 2012, 2017, 2022 онд Францын Ерөнхийлөгчийн сонгуульд нэр дэвшин өрсөлдөж байсан хэт барууны үндсэрхэг, цагаачлалын эсрэг үзэлтэй Марин Ле Пен болон Европарламентын найман депутат эд хөрөнгө хулгайлсан хэргээр шүүхээс ял сонслоо. Европын холбоо туслахуудынх нь хөлс хэмээн депутат бүрт сар бүр 21 мянган евро төлж байсан, гэвч тэдгээр туслахууд нь үнэн хэрэгтээ Үндэсний фронт намд ажиллаж байсан хэмээн шүүх үзжээ. Ле Пений туслахуудын дотор түүний эцэг Жан-Мари Ле Пений бие хамгаалагч байсан аж. 2004-2016 онд туслахуудыг хуурамчаар цалинжуулж байсан хэрэгт нийтдээ 27 хүн холбогджээ. Францын шүүх гуравдугаар сарын 31-нд шийдвэр гаргаж Марин Ле Пенийг хоёр жил тэнсэн, дахиад хоёр жил электрон бугуйвчтай гэрийн хорио, нийтдээ дөрвөн жилийн ял оноолоо.

Мөн төрийн байгууллагад нэр дэвшиж өрсөлдөхийг хориглосон тул тэрээр 2027 оны Ерөнхийлөгчийн сонгуульд оролцох боломжгүй болж байна. Марин Ле Пен шүүхээс гаргасан шийдвэрийг цөмийн бөмбөгтэй зүйрлэж буйгаа BMF телевизээр ярилаа. Францын эрх баригчид улс төрийн өрсөлдөгчдийнхээ эсрэг ийм айхтар тактик хэрэглэж байгаа бол сөрөг хүчин сонгуульд ялах нь гарцаагүй хэмээн тэрээр үзэж байна. “Шүүхийн шийдвэр нь анхнаасаа л улстөржсөн. Намайг 2027 оны Ерөнхийлөгчийн сонгуульд нэр дэвшүүлэхгүй байхад чиглэгдсэн. Хүний эрхийг дээдэлдэг Франц улсад шүүх авторитар дэглэмийн талд шийдвэр гаргаж байгаад сая сая францууд эгдүүцэж байна” хэмээн 56 настай Марин Ле Пен мэдэгдэв. Төрийн алба хашиж болохгүй гэсэн шийдвэрийг давж заалдах эрхгүй ч тэрээр парламент дахь суудлаа бүрэн эрхээ дуустал хадгалж үлдэнэ. Марин Ле Пений хэрэг сүүлийн хэдэн жил Францыг хамгийн их доргиосон хэрэг болж байна. Олон нийтийн судалгаагаар, тэрээр Францын Ерөнхийлөгчийн сонгуульд ялалт байгуулах хамгийн их магадлалтай хүнээр нэрлэгджээ. Гуравдугаар сард явуулсан судалгаагаар, француудын 37 хувь нь түүний төлөө саналаа өгөхөд бэлэн байгаа нь харагдсан юм. Марин Ле Пенд ял оноосон шүүгч нарын хувийн мэдээлэл өчигдөр олон нийтийн сүлжээгээр цацагдсан явдлыг Парисын прокурорын газраас шалгаж эхлэв. Шүүх хурлыг даргалсан Бенедикт де Пертю болон бусад шүүгч нарын гэрийн хаяг, зураг хөрөг, эрүүл мэнд, эд хөрөнгийн талаарх мэдээлэл цацагдсан нь тав хүртэл жил хорих, 75 мянган еврогийн торгуультай хэрэг хэмээн сануулж байна. Шүүгч нарын нэр, зураг олон нийтийн сүлжээнд ил болсон тул тэднийг доромжлох, заналхийлэх үзэгдэл гаарчээ.