Өнөөдрийн засгийн газрын хуралдаанаар Монгол Улсын нутаг дэвсгэрээр дамжуулан Оросын Холбооны Улсаас Бүгд Найрамдах Хятад Ард Улс руу байгалийн хий нийлүүлэх хоолой барих төслийн явцтай танилцсан байна. Тус төслийн талаар ЗГХЭГ-ын дарга Н.Учрал мэдээлэл хийлээ.

Н.Учрал ЗГХЭГ-ын дарга: Байгалийн хий дамжуулах хоолой нь хойд хилээс урд хил хүртэлх 958.6 км үргэлжилдэг. Зургаан аймаг 22 сумын газар нутгаар дайран өнгөрдөг. Энэ төсөл хэрэгжвэл урьдчилсан байдлаар эдийн засгийг тэлэх, барилга угсралтын үед мянга гаруй ажлын байрыг шинээр бий болгох зэрэг чухал ач холбогдолтой гэж үзэж байгаа.

Тус төслийг Шадар сайд С.Амарсайхнаар ахлуулж, Аж үйлдвэр эрдэс баялагийн яам ажлын алыг нь хариуцаж Эрдэнэс монгол нэгдлийн дэргэд Эрдэнэс газ төслийн нэгж хариуцаж ажиллаж байгаа. 

Мөн өнөөдөр засгийн газрын хуралдаанаар үндэсний баялгийн сангийн хуулийн хэрэгжилт, эрдэнэс тавантолгой компанийн ногдол ашгийг иргэдэд хуваарилах асуудлаар мэдээлэл хийж, тодорхой чиглэлүүд өгөгдсөн. 

Үндэсний баялгийн сангийн хуулийг хэрэгжүүлэх хүрээнд Аж үйлдвэр эрдэс баялгийн яамнаас стратегийн 16 ордын хил хязгаарыг тогтоох асуудлыг танилцуулсан. Мөн 2007 оны тогтоол дээр байсан 39 стратегийн ордыг УИХ-д өргөн барихаар шийдвэрлэлээ.

2024 онд Эрдэнэс тавантолгой компани 3.9 их наяд төгрөгийн борлуулалт хийсэн. Борлуулалт хийсний үр дүнд компанийн хуульд заасны дагуу санхүүгийн тайлангаа гаргасных нь дараа дөрвөн улиралд хувааж ногдол ашгийг иргэдэд хуваарилах шийдвэрлэсэн.

Ингэснээр өнгөрсөн хугацаанд иргэдэд ногдол ашиг тараасан. 1 иргэнд хувь хүний орлогын албан татвар хассан дүнгээр үлдэгдэл 93.500 төгрөг тараагдахаар төлөвлөгдсөн гэдгийг Эрдэнэс тавантолгой компанийн удирдлагууд засгийн газарт мэдээлсэн.

Шууд дамжуулалт: