Афганистанд сурвалжлагч хийж явсан Радослав Сикорски (62 настай) Польшийн дипломат албыг удирдаад есөн жил болж байна. Европын холбооны ахмад Гадаад хэргийн сайд нарын нэг тэрбээр Европ тив нэгдмэл байж Оросын заналхийллийн эсрэг зогсох ёстой гэж үздэг нэгэн. Испанийн RTVE телевиз түүнтэй уулзаж ярилцжээ. Польш нь улс төр, цэрэг дайн гээд олон талаар Оростой зөрчилдсөн урт удаан түүхтэй.

-Танай улс Оросыг үнэхээр аюул заналхийлэл гэж үзсээр байна уу?

-Сүүлийн 400 жилийн турш Орос улс биднийг олон удаа эзэлсэн. Тэд биднийг сүрдүүлж байвал бид нухацтай авч хэрэгтэй болдог. Бид ХIX зууны турш Оросын колони байлаа. Орос нь эзэнт гүрнээ дахин байгуулж, бусад улс үндэстнийг захирахыг оролдож байна.

-Иберийн хойг энэ заналхийлэлд нэг л итгэж өгөхгүй байгаа гэж танд санагдахгүй байна уу?

-Тийм ээ, Испани Орост хэзээ ч эзлэгдэж байгаагүй, хэзээ ч ийм юм болохгүй байх. Гэхдээ Оросын талаарх худал мэдээлэл та нарт хүрдэг бололтой. Оросууд бас аливаа нэг орны дотоод нөхцөл байдлыг удирдаж, хагарал үүсгэх гэж оролддог. Тэд бас Европт зэрэгцсэн дайн хийх санаатай байгааг бид мэдэж байна. Мадридад G5+ уулзалт дууслаа. Ямар үр дүн гарав? Ямар ч байсан бид энэ дайнд туйлдаж ядраагүй гэдгээ батлан хэлсэн. Ядарч туйлдах эрхтэй хүмүүс нь зөвхөн украинууд. Бид Украины талд гэдгээ дахин батлан илэрхийлж, Америкийн санаачилга үр дүнд хүрэхийг хүлээж байгаа ч Украин нь Оросоос хамааралтай гэдгийг ойлгож байгаа. Украин гал зогсоохыг зөвшөөрсөн ч оросууд байн байн шинэ болзол гаргаж ирж тулгаад байна.

-Оросууд гурван жилийн хугацаанд эзлэсэн газар нутгаа аваад үлдэхийг Европ зөвшөөрөх үү?

-Энэ бол манай үүрэг биш. Украин улс энх тайванд хүрэхийн тулд юугаа золиослохыг бид Украинд хэлэх нь зохисгүй. Гэвч хил хязгаараа хүчээр шийдүүлж болохгүй гэдэг дээр Испани ч, Польш ч санал нэг байгаа. Европ тив 800 тэрбум еврог цэрэг, зэвсэгтээ зарцуулна гээд байгаа. Ийм боломж бий юу? - Зарцуулах л хэрэгтэй. Энэ нь эхлээд бид нарт хэрэгтэй, учир нь бидний ашиг сонирхол нэг. Бид өөрсдийгөө аюулгүй гээд мэдэрчихвэл Вашингтон, Москва хоёр ч хүлээн зөвшөөрөөд нааштай үр дүн гарах болно.