Засгийн газрын хуралдаанаар  Ерөнхий сайд Л.Оюун-Эрдэнэ АТГ-ын дарга З.Дашдавааг бүрэн эрхийнхээ хүрээнд улираан томилох шийдвэр гаргаснаа танилцуулж, кабинетын саналыг сонсчээ. З.Дашдаваа нь  АТГ-ын даргаар 2019 онд томилогдож, бүрэн эрхийн хугацаа нь энэ жил дуусч буй юм. Авлигын эсрэг хуулийн 21.4-д Авлигатай тэмцэх газрын дарга, дэд даргыг нэг удаа улируулан томилж болно хэмээн заасан байдаг. Түүнчлэн түүнийг улираан томилох эсэх асуудал өнөөдөр Хуульзүйн байнгын хорооны хуралдаанаар орж, УИХ-ын чуулганаар хэлэлцэгдэнэ.

АТГ-ын дарга болсноос хойш З.Дашдаваа юу хийв?

З.Дашдаваа нь АТГ-ын даргаар ажиллах таван жилийн хугацаанд буюу  2019-2024 онд дотоодод авлигын гэмт хэргийн улмаас учирсан 2.6 их наяд төгрөгийг улсад нөхөн төлүүлжээ. Үүнийг он оноор задалж үзвэл:  

2019 онд 11.3 тэрбум төгрөг

2020 онд 35.6 тэрбум төгрөг

2021 онд 96.2 тэрбум төгрөг

2022 онд 2.3 их наяд төгрөг

2023 онд 238.6 тэрбум төгрөг

2024 онд 240.9 тэрбум төгрөгийн хохирлыг төлүүлжээ.

Үүнээс анзаарч харвал  2022 онд хамгийн их хэмжээний буюу 2.3 их наяд төгрөгийн хохирол нөхөн төлүүлсэн нь тод тусна. 2022 онд Хөгжлийн банкны, Дарханы төмөрлөгийн, Эрдэнэт үйлдвэрийн гээд томоохон хэргүүд шалгагдаж шийдэгдсэн.

Улмаар тухайн ондоо авлигаас учирсан 2.3 их наяд төгрөгийг барагдуулж, дампуурахдаа тулсан Хөгжлийн банкны гадаад өр, бондыг төлөхөд ихээхэн хувь нэмэр оруулж, 2023 онд Хөгжлийн банкны эрх бүхий 84 албан тушаалтанд холбогдох эрүүгийн хэргийг шүүхээр шийдвэрлүүлжээ. 

Сүүлийн 2 жилд 63 албан тушаалтныг үндэслэлгүй хөрөнгөжсөн байж болзошгүйг тогтоож, Эрүүгийн хуульд заасан зүйл ангиар хэрэг үүсгэн шалгажээ.  АТГ-ын оффшор бүсээс авчирсан хөрөнгийг дурдвал:

1. Англиас 1 орон сууц, 1.8 тэрбум төгрөг бэлнээр, 269.0 сая төгрөгийн үнэ бүхий үл хөдлөх хөрөнгө 2 ширхэг. Нийт 6.4 тэрбум төгрөг буюу 4.7 сая ам.доллар улсын орлого болгосон.
2. Виржини арлаас 2.2 тэрбум төгрөг буюу 1.6 сая ам.долларын үнэ бүхий газар, үл хөдлөх хөрөнгийг улсын өмчид бүртгүүлсэн.
3. Мэн арлаас 11.3 тэрбум төгрөг буюу 5.7 сая ам.доллар улсын орлого болгон хураан авсан.
4. БНСУ-ын нэр бүхий компаниас 1.7 сая ам.долларыг гаргуулан улсад оруулсан.

АТГ-ын мөрдөн шалгах ажиллагааны явцад гадаад улс орнуудаас нийт 13.9 сая ам. долларын өртөг бүхий хөрөнгийг буцаан авах үндэслэлийг тогтоож, шүүхийн шийдвэрээр улсын орлого болгожээ. 

Ерөнхий сайд  авлигачид, бүлэглэлүүдтэй нам харгалзахгүй тэмцэхээ мэдэгдэж, 5Ш ажиллагааг явуулж буй. Энэ хүрээнд авлигын гинжин хэлхээг таслан зогсоох ажилд АТГ-ын удирдлага,  мөрдөгчид ихээхэн үүрэг хүлээх нь тодорхой юм.