АТГ-ын дарга З.Дашдавааг улираан томилох асуудлыг УИХ-аар одоо хэлэлцэж байна. Энэ үеэр  УИХ-ын гишүүн Д.Жаргалсайхан нэр дэвшигчид хандан, “УИХ-ын гишүүдээс ямар дэмжлэг хүсэж байна вэ?” хэмээн асуулаа.

З.Дашдаваа “Авлигын төсөөллийн индекс буурсан байна гэдэг асуудал дээр АТГ, төр засаг буруутай гэсэн асуудал яригдаж байгаа. Энэ индекс нь УИХ-аас батлан гаргаж байгаа хууль тогтоомжууд амьдралд хэр нийцэж байна вэ, Монгол Улсын татварын орчин хэр байна вэ, улсын төсөв зөв зарцуулагдаж байна уу, түүнд тавих хяналт хэр байна вэ, бизнес хийх орчин, гадаадын хөрөнгө оруулалт орж ирэх орчин ямар байна гэх мэт асуумжуудын дагуу тавигдаж байгаа үнэлгээ юм.  Гадаадын хөрөнгө оруулалттай компаниуд дээр гарсан маргаанууд олон жил шийдэгдэхгүй яваад байгаа. Тийм учраас энэ төрлийн маргааныг Эрүүгийн биш Иргэний эрхзүйгээр шийдэх шаардлага байгаа. Одоо Эрүүгийн журмаар маргаан үүсгэж байгаа. Түүнчлэн олон улсын арбитраар шийдүүлэх, олон улсын арбитрын маргааныг манай улс хүлээн зөвшөөрснөөр гадны хөрөнгө оруулалт орж ирэх илүү таатай орчин бүрдэнэ. Бизнесийн орчинг хэрхэн сайжруулах зөвлөмжүүд байдаг тул энэ тал дээр онцгой анхаарах шаардлагатай гэж АТГ-ын даргын хувьд бодож байна.” гэлээ.