АТГ-ын даргыг улираан томилох асуудлыг хэлэлцэх үеэр УИХ-ын гишүүд үг хэлж, асуулт тавив. Энэ үеэр П.Сайнзориг гишүүн үр хүүхдээ багаас нь бусдад төвөггүй амьдарч сургах нь нийгэмд эерэг хандлагыг бий болгож, улмаар авлигын индексийг сайжруулахад нөлөөлнө гэдгийг онцоллоо.

Тэрээр хэлэхдээ “Авлигын төсөөллийн индекс муу байна гэхээр манайхан нэг байгууллагын асуудлыг л хөндөөд байна. Энэ бол Засгийн газар, Улсын Их хурал ажлаа хэрхэн хийж байгааг харуулж байгаа хэрэг. Өөрөөр хэлбэл, бид өөрсдөөсөө шаардах хэрэгтэй болж байгаа юм. Энэ индексийг урагшлуулахын тулд Улс төрийн намын санхүүжилтийн тухай, Төрийн өмчит компаний засаглал, Тендер худалдан авалтын тухай, Шүгэл үлээгчийн эрхзүйн байдлын тухай зэрэг хуулийг баталж байж, авлигатай тэмцэх асуудал дээр ахиц гарна.

Авлигын индексийг тодорхойлдог 8 шалгуур үзүүлэлтийн 13-хан хувийг хууль хяналтын байгууллагын үйл ажиллагаа эзэлдэг. Бусад нь макро эдийн засгийн асуудал байгаа юм. Тэгэхээр бид авлигын индексийг урагшлуулъя гэвэл иргэдийн  үндсэн эрх, эрх чөлөөг хэрхэн хамгаалах юм бэ гэдгээ шийдэх ёстой. Улс төрийн тогтвортой байдлыг хүчирхийллээр шийдвэрлэж байгаа байдлыг анхаарах ёстой. Төрийн үйлчилгээний үр нөлөө, бүтээмжийг сайжруулж, хуулиа дээдэлж байж, авлигын индексийг сайжруулна.

Эдгээрээс гадна үр хүүхдээ хүмүүжүүлдэг аргаа хүртэл өөрчлөх шаардлагатай байна. “Хүний дор битгий ор” гэж сургахын оронд бусдад төвөггүй амьдрах ухаан заамаар байна. “Үүнийг хийвэл би чамд чихэр өгнө” гэхийн оронд “Чи үүнийг сайн хийсэн байна”, “Бусдын төлөө сайн зүйл хийсэн байна” гэсэн урамшууллаар сольж, сэтгэлгээний өөрчлөлт буюу буруу зүйлтэй эвлэрэхгүй байх суурь хүмүүжил олгох хэрэгтэй байна.

Тэгэхээр хууль эрх зүйн орчин болон хууль хяналтын байгууллагынхан ажиллах нөхцөл бололцоо, төрийн үйлчилгээний хүртээмж, бүтээмж, дэд бүтцийн хөгжил, үр хүүхдээ хүмүүжүүлэх арга барил, энэ бүхнийг цогцоор нь шийдэж байж авлигыг бууруулна.” гэлээ.