"Доктор үүр” гар сарвууны эмнэлгийн гар сарвууны эмч О.Очирпүрэвээс эмийн бодисоос үүдэж өсвөр үеийнхэн гар, хуруу сарвуу тайруулж буй асуудлаар тодрууллаа. 

-Хар тамхины хэрэглээнээс болж судас бөглөрөх, хуруу гараа тайруулах тохиолдол эрс нэмэгдэж байгаа талаар сэрэмжлүүлэх боллоо?

-2016 онд улиралдаа нэг хоёр хүн үзүүлж байсан бол одоо долоо хоногтоо нэгээс хоёр болж, нас улам залуужиж байна. Үзэл бодол төлөвшсөн учраас 34-өөс дээш насныханд ийм асуудал харьцангуй бага байна.

Хамгийн аюултай нь мөчнөөсөө салчихаад дахиж хэрэглээд байна. Судас бөглөрсөн, мэдрэл нь үхжэн  ирж тайруулж, хөдөлмөрийн чадваргүй болж байна. Өсвөр үеийнхэн маань тахир дутуу болно гэдэг хамгийн аюултай байна.

-Энэ талаарх мэдээлэл одоо харьцангуй их болсон. Эцэг эхчүүд хүүхдийнхээ судсыг харьцангуй шалгаж байна уу? 

-Эмийн бодисыг аль болох л далд, судастай болгондоо хүүхдүүд тариад захын судаснаасаа эхэлж бөглөрөөд ирж байна. Хуруунаасаа эхэлж бөглөрөөд хүндэрвэл мөчөөр нь тайрах  арга хэмжээ авч байна. Ээж аавууд судсыг нь шалгахаас гадна хар тамхины тестээр үзэх хэрэгтэй.  Хүүхэд нь ийм болж байгааг эцэг эхчүүд хэзээ ч мэддэггүй. Хуруу, гар тайрах үед өсвөр үеийнхэн болон насанд хүрсэн хүн байсан ч аав ээжийг нь авчруулдан. Тэр үед л мэддэг юм.

Хүүхдийх нь гар өвдөөд байна, гар нь эвгүйтээд хүрэнтээд цайрах, хавагнах, цэврүү үсэрсэн үед хүүхдүүд эцэг эхдээ цохьсон гэдэг ч  юм уу тайлбарлаад өнгөрчихдөг. Эцсийн мөчид тайрах боллоо, судас нь бөглөрсөн байна гэх үед л аав ээж рүүгээ ярьдаг.

Нэг хоёр хэрэглээд үзвэл цаашид гарч чадахаа болино гэдгийг л анхааруулмаар байна. Нэгэнт хүүхэд нь орсон бол хүүхдээ алдаж байна гэдгийг ойлгох хэрэгтэй.

-Энэ төрлийн хэрэглэгчээ ямар байдлаар татаж байна?

-Ихэнх нь санаандгүй байдлаар найз нөхөдтэйгөө ууж идэх үед нэг мэдсэн миний гар ийм болсон байсан гэж ярьдаг. Бөмбөгөр худалдааны төв болон хар зах дээрх  зөвшөөрөлтэй зөвшөөрөлгүй эмийн худалдааг мөн зогсоох нь зөв. Оюун санаа бие бялдар нь төгөлдөршөөгүй, оддыг даган дуурайж хэрэглэж байгаа хүүхдүүдийн буруу биш.   Харин зарж борлуулж байгаа хүмүүсийн ялын бодлогыг чангаруулах хэрэгтэй байна.

-Дуудлагаар эм, тариа тарих үйлчилгээ хэр найдвартай үйлчилгээ вэ? Энэ төрлийн гэмт хэрэг даамжирахад нөлөөлж байна уу?

-Дуудлагын сувилагч, эмнэлгийн мэргэжилтнүүд хэнд хийж байгаагаа сайтар үнэлэх хэрэгтэй. Эмнэлгийн бичигтэй хиймээр байна. Ихэвчлэн ядаргаа, архины хордлогын дуудлагаар эм тариа хийлгэдэг байх. Гэхдээ нэгэнт донтсон хүмүүс нэг гараа тайруулсан ч дуудлагын сувилагчаар нөгөө гартаа тариулж тайруулах, эцэстээ амиа хорлох тохиолдол гарч байна. Тэгэхээр эцсийн төгсгөл нь ийм байна. Үүнээс илүү гоё зүйл болохгүй гэдгийг анхааруулмаар байна.