УИХ-ын гишүүн Л.Мөнхбаясгалангаас Төгрөг нуурын ордтой нэр холбогдоод буй Х.Баттулга гишүүний талаар байр суурийг нь тодрууллаа.

Монгол Улсын Ерөнхийлөгч асан, УИХ-ын гишүүн Х.Баттулга Төгрөг нуурын ордыг гадныханд зарсан гэх асуудал дээр та ямар байр суурьтай байгаа вэ?

УИХ-ын гишүүн Х.Баттулга, Ө.Шижир, Д.Жаргалсайхан нартай хамт 21 аймгаар тойрсон. Стратегийн ач холбогдолтой ордуудын жагсаалтын 18-т нь Төгрөг нуурын орд байгаа. Энэ жагсаалтыг бид уулзалтын үеэр тайзан дээрх дэлгэцэнд тавьж байсан. Хэрэв энэ орд Х.Баттулга гишүүнийх байсан бол энэ хүн өөрийнхөө өмчийг ард  түмэнд өгье гээд явж байгааг нь шударга гэх үү, тэнэглэл гэх үү?

Энэ Х.Баттулга гэдэг хүнийг 15 жил шалгаж, ямар нэг хэрэгт нэр холбож ирсэн. Энэ удаагийн асуудал зүгээр л 16 дахь жилийн үйл явц гэж би харж байна.

Төгрөг нуурын ордтой холбогдох ноцтой асуудлыг ЗГХЭГ-ын дарга Н.Учрал олон нийтэд мэдэгдэж, долоо хоногийн хугацаа өгье гэлээ. Энэ талаар АН-ын бүлэг дээр хэлэлцсэн үү? Та өөрөө хувь хүнийхээ хувьд асуусан уу?

Намын бүлгээр АТГ-ын даргыг улираан сонгох тухай л хэлэлцсэн. Төгрөг нуурын ордыг яриагүй. Н.Учрал гишүүний мэдэгдлийн тухайд надад дэмжсэн, эсэргүүцсэн ямар нэг байр суурь байхгүй. Гэхдээ долоо хоногийн хугацаа өгсөн нь зөв гэж бодож байгаа. Аль болох хурдан нэг талдаа гарсан нь дээр шүү дээ. Н.Учрал сайд төгрөг нуурын ордыг ярьсан шигээ бусад ордуудын талаар мөн ил тод ярьж, улс төрийн манлайлал үзүүлэх хэрэгтэй.

Та хувь гишүүнийхээ хувьд юу гэж дүгнэж байгаа вэ?

Би хувь гишүүнийхээ хувьд өөрөөс нь асуухад “Хэрвээ миний мэдлийн орд байсан бол би та нартай хамт 21 аймгаар тойрч, иргэдтэй уулзан, ард түмэнд өгнө гээд явах байсан уу?” гэж хариулсан.

Та MCS, Ухаа худагийн талаар хангалттай судалсан, ярьдаг. Тэгвэл яагаад Төгрөг нуурын ордыг судлаагүй юм бэ?

Би стратегийн ач холбогдолтой 39 ордоос заримыг нь судалсан. Гэхдээ би 39-үүлэнг нь заавал судлах ёстой юу? Төгрөг нуурыг ард түмний мэдэлд авах ёстой юу гэдэг дээр би авах ёстой гэсэн байр суурьтай байгаа. Гагцхүү улс төр битгий байгаасай, хуулийн байгууллагууд шалгаж, үнэн мөнийг нь олоосой л гэж хүсэж байна.

Шууд дамжуулалтыг үзэх холбоос: https://www.facebook.com/share/v/12HkyZsvBaY/