УИХ-ын гишүүн Б.Энхбаяраас зарим зүйлийг тодрууллаа. "Хоригдлыг галч болгож амраасан байна. Амралтын газар галч гэдэг хоригдол байдаг юм уу. Б.Жавхлан сайдын сонгуулийн ерөнхий менежер ямар хүн байсныг үзээрэй. Тэр хүн С.Батдөлтэй хамаатан байна уу ээж аав нь байна уу үзээрэй. Улс төрийн албан тушаалд хэний лоббигоор хэн хаана томилогдсон мэдээллүүд байдаг. С.Батдөлийг Б.Жавхлан авчирсан гэж улс төрийн хүрээнд ярьдаг. Би 2023 оны 12 дугаар сард нүүрсний сонсгол хийж байх үеэс л энэ талаар ярьж, гэрчээр дуудсан. "Бортээг" гэх ордын  нүүрс худалдан авах монополь гэрээний 10 хувийг Б.Жавхлангийн хамаарал бүхий компани оролцож авсан байна. Ингэхдээ хоёр удаагийн "Эрдэнэс тавантолгой"-гоос  тендер зарлахад цуцлаад, гурав дахь удаагийн уг тендерийн маргаан шалгагдаж байх үед Б.Жавхлангийн хамаарал бүхий компани нэмэлтээр орж ирж арван хувийг авсан. Энэ сэжиглэх асуудал мөн биздээ. Шинжээчийн дүгнэлтэд энэ талаар дурдагдсан. Б.Жавхлан орж ирж суугаад, шинжээчийн дүгнэлтийн өөртэй нь холбоотой хэсгийг сонсоод , асуулт асуухаас өмнө гараад явсан. Нэр цэвэр байсан бол асуултад хариулахгүй яасан юм. Түр хороо 1600 хуудас нотлох баримтыг хууль хяналтын байгууллагад хүргүүлсэн. Нотлох баримт хүргүүлснээс хойш  нэг жил хагас болчихоод байна" гэлээ.