Хүн намын дарга Т.Доржханд нам нь “MCS” группээс их хэмжээний хандив авсан ч гэлээ энэ нь тэдний халаасанд орно гэсэн үг биш хэмээн мэдэгдсэн хэрнээ араас нь “Стратегийн орд гэдэг ойлголт дэлхийд байхгүй. Стратегийн бүтээгдэхүүн, стратегийн салбар л гэж байдаг” гэж хэлээд амжсан. Яг ийм тархи угаалтыг сүүлийн үед “MCS” талыг баримтлагчид эрчимтэй хийх болсон.

Тэгэхээр эдгээр ойлголтыг маш энгийнээр тайлбарлах гэж оролдъё.

Стратегийн бүтээгдэхүүн гэдэг ойлголтод мах, сүү, гурил, үр тариа гэх мэт хүний анхдагч бөгөөд өдөр тутмын хэрэгцээний хүнснээс эхлээд бензин, эрчим хүч зэрэг улс орны аюулгүй байдалд чухал нөлөөтэй бараа бүтээгдэхүүнүүд багтана.

Стратегийн салбар гэх ойлголтод эрчим хүч, батлан хамгаалах зэрэг эдийн засгийн тогтвортой байдал, аюулгүй байдлын хувьд нэн чухал салбарууд орно.

Стратегийн ач холбогдолтой орд гэдэг ойлголтод Стратегийн салбаруудад шаардлагатай чухал түүхий эд бүхий байгалийн нөөцийн ордууд орно. Тодруулбал, жилд Монгол Улсын дотоод нийт бүтээгдэхүүний таван хувиас дээш хэмжээний бүтээгдэхүүн үйлдвэрлэж байгаа буюу үйлдвэрлэх боломжтой ордыг стратегийн орд гэнэ хэмээн хуульчилсан байдаг.

Хэдийгээр улс орон бүр өөр өөр нэр томъёо ашигладаг ч гэлээ эдийн засаг, аюулгүй байдал, геополитикийн хувьд өндөр үнэ цэнтэй, стратегийн нөөц гэсэн ойлголт олон улсад байж л байдаг. Хичнээн чухал ашигт малтмал байгаад өчүүхэн бага нөөцтэй бол тухайн орд нь стратегийн ач холбогдолтой байж чадахгүй. Тэгэхээр энэ ойлголтод нөөцийн хэмжээ зайлшгүй яригдах ёстой юм. Стратегийн ордод оруулахаар жагсаасан 39 орд бүгд л ихээхэн хэмжээний нөөцтэй байгаа нь санамсаргүй хэрэг биш л дээ.

Гэтэл Монгол Улсын шадар сайд Т.Доржханд “Стратегийн орд гэж байхгүй” хэмээн мэдэгдсэн нь энэ тодорхойлолтод багтах ордуудыг дангаараа эзэмшиж байгаа, тодорхой хувийг нь төрд алдах нөхцөл байдал үүсчихээд байгаа ордуудын эзэд буюу хандивлагчдынхаа эр ашгийг хамгаалан дуугарч байгаа хэрэг биш гэж үү? Үг, үйлдэл нь зөрөх сайдтан санхүүжүүлэгч эздийнхээ эрх ашгийг хэр хол хүртэл хамгаалахыг цаг хугацаа харуулах биз.